Agjencia e Ushqimit dhe Veterinarisë ka bërë të ditur se ka asgjësuar 2 mijë e 288 rriska gjedhi të prodhuesit “FLOR-EN”, brenda një marketi.

Ekipa e agjencisë ka inspektuar në një market, pas raportimit të një konsumatori, i cili ka thënë që pas hapjes së një konserve e ka parë që është e pa përshtatshme për konsum.

“Ne dy llote prodhimi pas hapjes është vërejtur se brenda është krijuar ajër kundërmues, kishte filluar putrifikimi (kalbëzimi) dhe ne aspektin organoleptik kishte ndryshime. Sipas procedurës ekipi inspektues menjëherë ka urdhëruar grumbullimin e të gjitha produkteve nga dy llotet e dyshimta dhe të njëjtat janë asgjësuar”, thuhet në njoftim.

Tutje, është bërë e ditur se asgjësimi është kryer menjëherë në prezencë të inspektorëve veterinar, Zyra Regjionale e AUV-së Mitrovicë.

“Sasia e gjetur e produkteve e dy llotëve të prodhimit njëra me datë skadimi 22.02.2025 dhe tjetri me datë skadimi 17.03.2025 në sasi prej 2288 copë konservë njësi 200 gr. Asgjësimi është kryer menjëherë në prezencë të inspektoreve veterinar, Zyra Regjionale e AUV-së Mitrovicë. Në të njëjtën kohë është urdhëruar rrjeti tregtar të bëjë tërheqjen e menjëhershme të produktit të dy llotëve sipas datave të skadimit nga të gjitha pika shitëse”, thuhet tutje në njoftim.

Gjithashtu, ndaj qytetarëve është bërë thirrje për kujdes, duke rekomanduar që të lajmërohet autoriteti në qoftë se hasin në produktet e “FLOR-EN” me datë skadimi 22.02.2025 dhe 17.03.2025 paketim 200 gr.

“Kujdes konsumatorë! Nëse i gjeni në shitje Produktet e brendit “FLOR-EN” me data skadimi 22.02.2025 dhe 17.03.2025 paketim 200 gr lajmëroni autoritetin. Nëse i keni blerë kthejni në pikën shitëse. Mos i konsumoni produktet e cekura me lartë!

Produktet e brendit “FLOR-EN” të datave tjera të skadimit nuk janë të dyshimta

080050095 thirrje pa pagesë”.