Qeveria norvegjeze ka vendosur t’i dhurojë Ukrainës deri në 2,000 raketa-hedhës të njëpërdorimshëm të armëve të lehta sulmuese M72, nëpërmjet Polonisë.

Norvegjia e kishte kufizuar më parë mbështetjen e saj në një paketë ndihme humanitare prej 2 miliardë NOK (230 milionë dollarë), plus helmeta dhe jelek antiplumb – por qeveria ndryshoi me shpejtësi qëndrim, transmeton Demokracia.com.

“Qeveria ka vendosur këtë pasdite që Norvegjia do t’i ofrojë Ukrainës mbështetje me armë për të mbrojtur vendin nga sulmi ushtarak nga Rusia. Kështu, ne jemi në të njëjtën linjë me aleatët e ngushtë dhe vendet e tjera nordike”, tha kryeministri Jonas Gahr Støre.

Ai shtoi: “Norvegjia ka një praktikë kufizuese për eksportimin e materialit mbrojtës, por Ukraina tani është në një situatë emergjente”.

Norvegjia i bashkohet një numri në rritje të vendeve evropiane për të ofruar armë këmbësorie për Ukrainën për ta ndihmuar atë të luftojë pushtimin rus. /Demokracia.com/