Nën moton “Asnjë cent më shumë” po bëhen përgatitjet e fundit për protestën e nesërme kundër rritjes së çmimit të energjisë elektrike.

Në lidhje me protestën që do të mbahet nesër nga ora 15:00 në sheshin “Skënderbeu” në kryeqytet ka folur organizatori i protestës, Luan Hasanaj, i cili tha se nesër do ta kundërshtojnë një vendim, siç e cilësoi ai, shumë të dëmshëm për secilin qytetar të vendit.

“Është një mesazh i thjeshtë, reagimi ynë ka ardhur si rezultat i një trendi të rritjes së çmimeve në mënyrë pothuajse të pakontrolluar të viteve të fundit. Grup shumë i madh i qytetarëve mezi e kalojnë muajin me të hyrat që i marrin dhe duke e parë se çfarë po vjen”.

“Kur themi se 15% do të rritet çmimi i rrymës dhe kjo do të ketë efekt zinxhir në secilin sektor, mesazhi ynë për ata që janë vendimmarrës është i thjeshtë: na mundësoni që ne qytetarët që kemi vendosur të jetojmë në këtë vend, të kemi mundësi që t’i përballojmë këto çmime dhe faturat që na vijnë çdo muaj”, tha Hasanaj në Edicionin Special në Klan Kosova.

Më tej, Hasanj u shpreh se kërkesa në drejtim të Zyrës së Rregullatorit të Energjisë është pezullimi i i rritjes së çmimit të energjisë prej 15 për qind, derisa të konstituohen institucionet e reja.

“Ne të vetmin që e kemi në dorë është zëri ynë dhe reagimi qytetar, pra ne nuk do t’i ndalim protestat. Do të kërkojmë që të jetojmë normalisht në këtë vend. Ne e kemi bërë një kërkesë shumë të thjeshtë për ZRrE-në, i kemi thënë ta pezullojë këtë vendim në këtë kohë, t’i presim konstituimin e institucioneve, pra jemi pa qeveri, janë në prag institucionet”, tha ai.

Kundër shtrenjtimit të energjisë elektrike ka dalë edhe Presidenca, ku përmes një reagimi pati thënë se rritja e çmimit të rrymës do të ketë efekt zinxhir.