Policia e Kosovës ka arrestuar një person në Sllatinë, pasi që dyshohet se i ka vënë zjarrin në pjesë të tokës.

Kjo është bërë e ditur përmes një komunikate për media, ku mes tjerash, thuhet se duke iu referuar temperaturave të larta dhe erërave, zjarret potencialisht përhapen shumë shpejt dhe po ashtu shkaktojnë rrezikim të përgjithshëm dhe pasoja të rënda kudo që shfaqen, përcjell Demokracia.com.

“Policia e Kosovës kërkon nga të gjithë qytetarët që të jenë të kujdesshëm, të shmangin ndezjen e zjarreve dhe të raportojnë apo lajmërojnë autoritetet për çdo person të dyshuar që mund të jetë i përfshirë në raste të tilla të zjarr vënieve. Policia e Kosovës më datë 03.08.2021, ka pranuar informacionin se në rrugën e Pejës në Fushë Kosovë, fshati Sllatinë gjendët një vatër e zjarrit ku po digjej një pjesë djerrine. Njësiti policor ka reaguar menjëherë në lokacion dhe duke vlerësuar mundësinë e përhapjes së mëtejme të zjarrit ka njoftuar Zjarrfikësit”, thuhet në njoftim.

Zyrtarët policor kanë ndaluar një person të dyshuar, janë ndërmarrë veprimet e nevojshme ligjore dhe në konsultim me prokurorin kompetent, është iniciuar rast për procedura të mëtejme.

Ndryshe, në disa pjesë të Kosovës tashmë janë shkaktuar disa vatra të zjarrit, ku situatë më e rëndë është në Pejë dhe Suharekë./Demokracia.com/