Partia e Albin Kurtit, Lëvizja Vetëvendosje, ia ka besuar postin e Kryesueses së Këshillit të Përgjithshëm në parti Arbërie Nagavcit, të cilës i janë dashur plot 10 vjet që t’i përfundojë studimet master. Ajo i mbaroi këto studime me notën mesatare hiç më shumë se 6.46.
Lëvizja Vetëvendosje sot e ka mbajtur mbledhjen e Këshillit të Përgjithshëm të Lëvizjes Vetëvendosje, ku edhe i ka zgjedhur strukturat e reja.
Albin Kurti do të jetë kryetar, Glauk Konjufca nënkryetari i parë, ndërsa Mrika Limani Myrtaj nënkryetare e dytë. E Alim Rama do të jetë sekretar i Lëvizjes Vetëvendosje.
Partia që e qeverisë vendin ia ka besuar postin e Kryesueses së Këshillit të Përgjithshëm, Arbërie Nagavcit.
Demokracia.com pati publikuar diplomën e ministres Nagavci, të lëshuar nga Universiteti i Prishtinës – Fakulteti Juridik, ku thuhet se ajo “u regjistrua në vitin akademik 2009/2010 në studimet master” dhe “studimet i mbaroi më 5 prill 2019”, pra pas plot 10 vjetësh.
Me mbrojtjen e temës së diplomës, Arbërie Nagavci ka fituar titullin: Ma. Sc. i shkencave juridike ndërkombëtare. Tema të cilën ajo e ka mbrojtur kishte për titull: “Aspekti krahasimor i të drejtës martesore në Republikën e Kosovës me atë Republikën e Shqipërisë dhe Republikës së Maqedonisë”. /Demokracia.com/
