“Ne jemi thellësisht të shqetësuar për pushtimin Rus të Ukrainës dhe qëndrojmë me të gjithë njerëzit që po vuajnë”, tha Apple në një deklaratë të dhënë për mediat të martën. “Ne kemi ndërprerë të gjitha shitjet e produkteve në Rusi.”

Kompania shtoi se tashmë kishte “ndaluar të gjitha eksportet në kanalin e tyre të shitjeve në vend” javën e kaluar.

Deklarata shtoi: “Apple Pay dhe shërbimet e tjera janë kufizuar. RT News dhe Sputnik News nuk janë më të disponueshme për shkarkim nga App Store jashtë Rusisë. Dhe ne kemi çaktivizuar trafikun dhe incidentet e drejtpërdrejta në Apple Maps në Ukrainë si siguri dhe masë paraprake për qytetarët ukrainas”.

Javën e kaluar, Zëvendëskryeministri i Ukrainës dhe Ministri për Transformimin Dixhital, Mykhailo Fedorov publikoi në Twitter një letër të hapur drejtuar Apple, në të cilën ai i kërkoi kompanisë që të ndërpresë Rusinë nga produktet, shërbimet dhe App Store.

Marka të tjera të mëdha ndërkombëtare, si Nike, kanë njoftuar gjithashtu se do të tërhiqen nga tregu rus. Gjigantët e pagesave Mastercard, American Express dhe Visa kanë bërë lëvizje të ngjashme. Ndërkohë, Warner Bros tërhoqi publikimin e filmit “The Batman” në Rusi, i cili supozohej të dilte të premten, pas një lëvizje të ngjashme nga Disney.

Prodhuesi amerikan i avionëve Boeing njoftoi të martën se do të pezullojë pjesët, mirëmbajtjen dhe mbështetjen teknike për linjat ajrore ruse dhe operacionet kryesore në Moskë.

Gjigandi amerikan i naftës Exxon Mobil njoftoi gjithashtu të martën se do të mbyllte operacionet e tij në Rusi dhe do të ndalonte çdo investim të ri në vend. Njoftimi i Exxon pasoi BP, Shell dhe Equinor, të cilët thanë në fillim të javës se do të largoheshin nga operacionet e tyre në Rusi.