Bashkimi Evropian tha se është në dijeni të synimeve të Kosovës për të paraqitur aplikimin për anëtarësim në Bashkimin Evropian, por e ka qartësuar se Traktati i BE-së përcakton procedurat për përafrim për anëtarësim.

Zëdhënësja e BE-së, Ana Pisonero, në një konferencë me gazetarë në Bruksel, ka thënë se i mbetet Këshillit që ta marrë në konsideratë aplikimin sapo ta pranojë.

Pisonero e konfirmoi takimin e komisionerit për zgjerim, Oliver Varhelyi me zëvendëskryeministrin, Besnik Bislimi.

“Komisioneri Varhelyi pati sot një takim me zëvendëskryeministrin e Kosovës, Bislimi. Kosova e ka bërë publike synimin e saj për të aplikuar për anëtarësim në BE. Natyrisht, kjo nuk na takon neve ta komentojmë. Traktati i Bashkimit Evropian është i qartë për sa i përket procedurave për aplikimin për anëtarësim në BE, dhe ju e dini se i takon Këshillit, nëse dhe kur të mbërrijë një kërkesë e tillë, që ta shqyrtojë atë”, tha ajo.

Bislimi po qëndron në Bruksel për një vizitë zyrtare dhe është bërë me dije se vizita e tij përputhet me synimet e Kosovës për të paraqitur aplikimin për anëtarësim në BE.

Kryeministri Albin Kurti ditë më parë ka thënë se aplikimi për anëtarësim në BE do të ndodhë brenda këtij muaji.