Vendet e BE-së duhet të përgatiten të bëjnë “sakrifica ekonomike” dhe të miratojnë ndalimin e shumëpritur të importeve të naftës ruse, tha ambasadori i Ukrainës në BE, Vsevolod Chentsov. Komentet e tij vijnë në mes të një ngërçi diplomatik në lidhje me embargon e propozuar të naftës, masa më gjithëpërfshirëse dhe konsekuente e zbuluar nga blloku që nga fillimi i luftës në Ukrainë.

Pika kryesore e mosmarrëveshjes mbetet afati kohor ambicioz i parashikuar nga Komisioni Europian: një heqje graduale e të gjithë naftës bruto ruse në gjashtë muaj dhe të gjitha produkteve të naftës së rafinuar deri në fund të vitit.

Hungaria, Sllovakia, Republika Çeke dhe Bullgaria po kërkojnë përjashtime në mënyrë që të kenë më shumë kohë për të përshtatur sistemet e tyre të energjisë dhe për të siguruar ofrues alternativë.

“Ne mendojmë se ky solidaritet, i cili është deklaruar, duhet të shndërrohet në veprim. Deri më tani, Bashkimi Europian ka qenë mjaft i bashkuar për sanksionet. Shpresojmë që kjo krizë për embargon e naftës të kapërcehet,” tha ambasadori Chentsov të martën pasdite.

“Ne presim vendimmarrës në Hungari, në vende të tjera, ata janë njerëz, ata e kuptojnë se çfarë po ndodh në Ukrainë. Ata vetë mund të shohin nivelin e mizorive rreth Kievit dhe qyteteve të tjera. Pra, për të ndaluar Rusinë, mendoj, Vendet anëtare të BE-së duhet të jenë gjithashtu të gatshme për sakrifica të caktuara, duke përfshirë sakrificat ekonomike”.

I pyetur nëse është i zhgënjyer nga diskutimet e ngecura, ai u përgjigj: “Po, jemi sepse bëhet fjalë për luftën tonë të përbashkët kundër diktaturës, kundër agresorit”. “Ajo që ne do të donim të shmangnim është bllokimi i këtij vendimi për arsye të tjera, përfshirë ato politike. Kjo është shumë e rëndësishme për ne,” vuri në dukje ai. AP