Një rritje e madhe të varianteve të reja të COVID-19 dhe aksesi i dobët në vaksinat në vendet në zhvillim kërcënojnë rimëkëmbjen ekonomike globale, paralajmëruan të shtunën ministrat e financave të 20 ekonomive më të mëdha në botë.

Takimi i G20 në qytetin italian të Venecias ishte takimi i parë ballë për ballë i ministrave që nga fillimi i pandemisë.

Vendimet përfshijnë miratimin e rregullave të reja që synojnë të ndalojnë ndërmarrjet shumëkombëshe duke zhvendosur fitimet në vendet të cilat kanë ligje që mundësojnë taksa më të ulta.

Kjo hap rrugën për udhëheqësit e G20 për të finalizuar një normë të re globale të taksës minimale të korporatave prej 15 përqind, një lëvizje që mund të rikuperojë qindra miliarda dollarë për thesaret publike të cilat janë dëmtuar gjatë pandemisë.

Një komunikatë përfundimtare tha se perspektiva ekonomike globale ishte përmirësuar që nga bisedimet e G20 në prill falë shpërndarjes së vaksinave dhe paketave të mbështetjes ekonomike, por pranoi brishtësinë e tij përballë varianteve si Delta që përhapet shpejt.

“Rimëkëmbja karakterizohet nga divergjenca të mëdha brenda vendeve dhe mbetet e ekspozuar ndaj rreziqeve negative, në veçanti përhapjes së varianteve të reja të virusit COVID-19 dhe hapave të ndryshëm të vaksinimit,” lexohet në të.

Ndërsa kombet e G20 premtuan të përdorin të gjitha mjetet e politikës për të luftuar COVID-19, mikpritësit italianë të takimit thanë se kishte gjithashtu marrëveshje për të shmangur vendosjen e kufizimeve të reja.