Barcelona është duke e ndjekur me interes sulmuesin e Feyenoordit, Igor Paixao, si një alternativë për krahun e majtë të sulmit, në kuadër të planeve për sezonin e ri nën drejtimin e trajnerit Hansi Flick.

Sipas Sempre Barca, Igor Paixao, 24-vjeçari brazilian, është një nga emrat kryesorë në listën e klubit katalanas.

Me aftësinë për të luajtur në të dyja krahët dhe madje edhe në pozita më të brendshme, ai përshtatet mirë me filozofinë e Barcelonës.

Në këtë sezon me Feyenoordin, Paixao ka shënuar 18 gola dhe ka dhuruar 14 asistime në 46 ndeshje, duke dëshmuar një formë mbresëlënëse që ka tërhequr vëmendjen e klubeve evropiane. Klubi holandez kërkon një tarifë prej 35–40 milionë eurosh për kartonin e tij.

Barcelona megjithatë nuk është e vetme në garë. Arsenal, Liverpool, Aston Villa, Napoli, Atalanta dhe Roma kanë shfaqur gjithashtu interes për lojtarin.

Skautët e Barçës kanë ndjekur performancat e tij gjatë gjithë sezonit, por ende nuk ka një ofertë zyrtare në tryezë.

Në një intervistë të fundit, Paixao u shpreh me admirim për Raphinhan, duke e cilësuar atë si një model për brazilianët e rinj. “Raphinha është një shembull për mua dhe për shumë lojtarë në Brazil”, u shpreh ai, duke mos fshehur dëshirën për të luajtur përkrah tij.

Transferimi i mundshëm i Paixao në ‘Camp Nou’ do të vinte në një moment kur largimi i Ansu Fati është gjithnjë e më i mundshëm.

Kjo do t’i hapte rrugë një përforcimi të ri në të majtë të sulmit, me Paixao që shihet si një profil i freskët, energjik dhe premtues për të ardhmen e klubit.