Kryeministri në detyrë, Albin Kurti, bashkë me ministren po ashtu në detyrë, Arbërie Nagavci, njoftuan gjatë ditës së sotme se është akredituar programi Master në Energjetikë në Fakultetin e Inxhinierisë Elektrike dhe Kompjuterike (FIEK).

Madje deputetja Nagavci, për akreditimin e këtij programi, merita madhore i dha shefit të saj të partisë, Kurtit.

“Këto arritje janë rezultat përveç tjerash edhe i bashkëpunimit konstruktiv si dhe një kërkese të drejtpërdrejtë të Kryeministrit Albin Kurti, gjatë një vizite në FIEK, duke pas parasysh rëndësinë e këtyre programeve”, shkroi mes tjerash, Nagavci, raporton Klankosova.tv.

Por, krejt këto krekosje të dyshes së mësipërme po i hedh poshtë deputetja e LDK-së, Hykmete Bajrami.

Duke qenë pjesë e stafit akademik në Universitetin e Prishtinës prej vitit 2004, ajo thotë se politika nuk ka asnjë meritë në akreditimin e programeve.

“Lej more punët e të tjerëve, se as ti as Nagavci asnjë meritë aty nuk e keni. Këtë e them me përgjegjësi të plotë se jam pjesë e stafit akademik në Universitetin e Prishtinës prej vitit 2004, disa herë kam marrë pjesë në akreditim të programeve të reja dhe të atyre ekzistuese. Krejt programet e reja hartohen dhe mbrohen para ekspertëve të akreditimit nga stafi akademik dhe asnjë një punë këtu as qeveria as MASHT-i nuk ka, asnjë të vetme”, u shpreh mes tjerash Bajrami.

E në këtë drejtim, deputetja e LDK-së nuk la pa kritikuar Kurtin për situatën me energji elektrike në vend, gjegjësisht për rritjen e çmimit të saj.

“Por, meqë qenka program për energjetikë, pse s’po folë për skandalet në këtë sektor, Albin? Ti je përgjegjës për gjendjen dhe skandalet në sektorin e energjisë, sepse ish-ministrja e ekonomisë, njerëzit që i keni çu në ZRRE dhe në KOSTT, kanë leju dhe kanë ndihmu të lulëzojë mafia e energjetike”.

“Kur ju keni folë për Damir Fazlliçin e Vuk Hamoviçin, për besë ne tjerët as idenë se kemi pasë kush janë ata. Merre lexoji të dhënat e publikuara te buletini ekonomik dhe përgjigju. 1.11 Euro është ble shërbimi i transportit për një MWh e na është shitë neve 798.32 Euro. Njëra prej kompanive përfituese ishte EFT sipas teje është e këtij Vuk Hamoviçit, ajo tjetra NOA, që ka hy në treg për herët të parë në qeverisjen tënde dhe sot është kompania e 8-të për nga qarkullimi në Kosovë, mos harroj i ka dy punëtorë. Të varfër apo të vjedhur? Deklarohu Albin”, u shpreh deputetja e LDK-së, Hykmete Bajrami. /Klankosova.tv