Shefja e Politikës së Jashtme të BE-sa, Kaja Kallas, ka deklaruar se në Serbi, me përfaqësuesit atje ka folur edhe për marrëdhëniet që kanë me Kosovën.

Në një konferencë për media, ajo ka theksuar se ka në plan që të ftojë përfaqësues nga Kosova dhe Serbia në Bruksel për të vazhduar me bisedimet para për normalizimin e marrëdhënieve mes dy shteteve.

“Folëm për marrëdhëniet e Serbisë me fqinjin e saj për normalizimin e marrëdhënieve me Kosovën. Nuk është vetëm një përmirësim i marrëdhënieve, por është edhe thelbësore për të ardhmen evropiane të Serbisë. Është koha për të kapërcyer të kaluarën dhe për t’u përqendruar në të ardhmen e përbashkët. Planifikova të ftoja përfaqësuesit nga Beogradi dhe Prishtina në Bruksel sa më shpejt të jetë e mundur për të diskutuar hapat konkretë përpara”, ka thënë Kallas.

Kaja Kallas, në konferencën për shtyp në Beograd është pyetur për kërkesën e Serbisë për themelimin e Asociacionit të komunave me shumicë serbe si dhe atë të Kosovës për heqjen e masave ndëshkuese.

Kallas refuzoi të përgjigjet në këtë pyetje pa i takuar edhe përfaqësuesit në Kosovë.

“Ne do të udhëtojmë nga këtu në Kosovë. Unë nuk do të komentoj për këtë para se të ulem edhe me Kosovën dhe të adresoj të gjitha shqetësimet që kemi me ta. Kështu që unë do ta bëj atë atëherë”, tha Kallas.

Kryediplomatja e BE-së tha se në procesin e dialogut Kosovë-Serbi është e re dhe tha se normalizimi i plotë i marrëdhënieve mes këtyre dy vendeve është ajo që nevojitet.

“Meqenëse jam i ri në këtë proces, ne kemi hartuar se çfarë funksionon dhe çfarë nuk funksionon në këtë proces. Sepse ajo që na duhet është normalizimi i marrëdhënieve. Është e nevojshme për të ardhmen e të dy vendeve. Pra, kjo është ajo për të cilën ne po punojmë”.