Fondi pritet të marrë miratimin zyrtar javën e ardhshme.

27 shtetet anëtare të Bashkimit Evropian kanë dhënë miratimin paraprak për një fond mbrojtjeje prej 150 miliardë eurosh që do të shpërndajë para për vendet që kërkojnë të investojnë në aftësi sigurie si municione, dronë dhe mbrojtje të infrastrukturës kritike.

Kështu rezulton sipas njerëzve të njohur me çështjen, të cilët e kanë konfirmuar lëvizjen për Bloomberg.

Fondi pritet të marrë miratimin zyrtar javën e ardhshme, ka thënë njëri prej tyre në kushte anonimiteti.

Programi u propozua nga Komisioni Evropian, krahu ekzekutiv i BE-së, në mars si një përgjigje ndaj tërheqjes së Presidentit Donald Trump të sigurisë amerikane në Evropë.

Fondi vjen përveç rregullave të reja që u lejojnë shteteve anëtare fleksibilitet fiskal për shpenzimet në mbrojtje, të cilat mund të mobilizojnë një total prej 800 miliardë eurosh.

Komisioni do të mbledhë 150 miliardë euro në tregjet e kapitalit dhe do t’i shpërndajë paratë si kredi për shtetet anëtare me kërkesë për të financuar produkte specifike që kontinentit i mungojnë më shumë, sipas njërit prej burimeve.

Këto përfshijnë raketa, aftësi tokësore dhe sisteme mbrojtjeje nga raketat.

Disa vende jashtë BE-së janë të pranueshme për të marrë pjesë në program, me kusht që këto shpenzime të mos kalojnë 35% të kostos, tha personi.

Mbretëria e Bashkuar dhe BE-ja arritën një partneritet mbrojtës të hënën dhe blloku u zotua të eksplorojë mënyra për t’i lejuar Londrës akses në program.

Instrumenti i ri i kredisë do të jetë i ngjashëm me atë të krijuar gjatë pandemisë për të mbështetur skemat e punës me kohë të shkurtër të shteteve anëtare dhe masa të ngjashme.

Presidentja e Komisionit Ursula von der Leyen e ka quajtur këtë një “moment që ndodh një herë në një brez” dhe më parë ka thënë se BE përballet me nevoja për investime në mbrojtje prej rreth 500 miliardë eurosh gjatë dekadës së ardhshme.