Dëshmitari me numër 29, ishte planifikuar të dëshmonte para shumë muajsh në Gjykatën Speciale të Hagës, në rastin e krerëve të UÇK-së.

Megjithatë, ai nuk pranoi. Madje, akuzonte Prokurorinë se ia kanë falsifikuar nënshkrimin.

Me kalimin e kohës, Prokuroria e Hagës bëri tentativa të tjera, por dështuan. Si rezultat, më pas, pas konsultave mjekësore, dëshmitarit me shifër W04577 iu konstatuan probleme mendore.

Prokuroria e Specializuar bëri kërkesë që deklaratat e këtij dëshmitari, të pranohen.

Megjithatë, me vendimin e fundit, gjyqtarët e Speciales, e kanë refuzuar një kërkesë të tillë. Në vendimin të cilin e ka parë Nacionale, thuhet se provat e këtij dëshmitari, nuk pranohen.

“Paneli vëren në këtë drejtim se Prokuroria ishte njoftuar për vështirësitë që lidheshin me gatishmërinë dhe përgatitjen e dëshmitarit për të dëshmuar dhe kërkesat përkatëse që ai bëri në lidhje me të. Prandaj, PSP-ja kishte njoftim dhe kohë të mjaftueshme për të siguruar dëshminë e dëshmitarit ose për të kërkuar ndihmë të përshtatshme nga Paneli. Për këto arsye, Paneli nuk e gjen të vërtetën në pohimin e ZPS-së se ka bërë të gjitha përpjekjet e arsyeshme për të siguruar paraqitjen e W04577 para Panelit dhe se dëshmitari nuk është në gjendje të dëshmojë [REDAKTUAR]”, thuhet në vendimin të cilin e ka parë gazeta Nacionale.

“Përfundim. Pas asaj që u tha më sipër, Paneli konstaton se Dëshmia e Propozuar e W04577 është e papranueshme sipas Rregullave 138(1) dhe 155. Rrjedhimisht, ËPSO lirohet nga detyrimi i tij për [REDAKTUAR]”, përfundon vendimi.

Historia e dëshmitarit 29

Prokuroria e Hagës kishte kërkuar që provat dhe dëshmitë që ndërlidhen me këtë dëshmitar, të pranohen në rastin e krerëve të UÇK-së, edhe pse ai nuk është në gjendje të dëshmojë.

Në parashtresën të cilën e ka parë Nacionale, thuhet se provat duhet të pranohen, pasi dëshmitari nuk është në gjendje të dëshmojë si pasojë e problemeve mendore.

“Kur ai u shfaq për herë të parë në gjykatë më 10 tetor 2023, W04577 kërkoi të konsultohej me një avokat; Paneli e miratoi kërkesën e tij. Më 11 tetor 2023, Avokati i W04577 kërkoi shtyrje, kërkesë të cilën Paneli e miratoi. Më 18 tetor 2023, Avokati i W04577 kërkoi një shtyrje tjetër. Më 31 tetor 2023, Paneli shtyri dëshminë e W04577 deri në njoftim të mëtejshëm dhe urdhëroi [REDAKTUAR].
Për rrjedhojë, në këto rrethana, janë ndërmarrë përpjekje të arsyeshme për të siguruar shfaqjen e W04577, dhe, për shkak të dëmtimit mendor, W04577 nuk është në gjendje të dëshmojë”, thuhet në parashtresë raporton Nacionale.

Dëshmitari, sipas Prokurorisë, kishte dijeni për beteja të ndryshme të UÇK-së dhe individë të ndryshëm të ndaluar nga UÇK-ja.

“Në lidhje me çështje të ndryshme, përfshirë [REDAKTUAR], pjesëmarrjen në beteja, dhe individë të ndaluar nga anëtarët e UÇK-së në disa lokacione. Shënimi i Përgatitjes së W04577 1 është gjithashtu autentik dhe i dobishëm. Ai është dokumentuar në shabllonin zyrtar të Prokurorisë dhe përfshin detaje si data dhe ora e takimeve dhe identitetin e atyre që ishin të pranishëm”, thuhet në parashtresë.

Edhe pse mbrojtja nuk ka pasur mundësinë që t’i përballë pretendimet e dëshmitarit me pyetje, për Prokurorinë kjo nuk është fort me rëndësi.

“Për më tepër, megjithë pamundësinë e Mbrojtjes për të kryer pyetje të drejtpërdrejta ndaj W04577, një faktor të cilin Paneli do ta marrë parasysh kur të vlerësojë tërësinë e provave të pranuara në gjyq, Mbrojtja ka pasur mundësinë të pyeste dëshmitarë të tjerë mbi disa çështje të trajtuara në Dëshmitë e Propozuara dhe/ose mbi W04577 vetë. Çelësi është se Mbrojtja është në dijeni të identitetit të W04577, mund të hetojë atë, motivet dhe besueshmërinë e tij, dhe ka mundësinë të sfidojë Dëshmitë e Propozuara në gjyq dhe të paraqesë një version tjetër të ngjarjeve”, thuhet më tutje.

Historia e dëshmitarit që e trazoi Gjykatën Speciale

Kur u paraqit për të dëshmuar në tetorin e vitit të kaluar në seancë të Gjykatës Speciale, dëshmitari i 29-të në rastin e krerëve të UÇK-së, refuzoi ta bënte një gjë të tillë. Madje, ai ishte shprehur i gatshëm të shkonte në burg, por jo të përgjigjej.

Megjithatë, dukej që misteret e dilemat për këtë dëshmitar vetëm sa u shtuan. Kjo pasi në emër të dëshmitarit është dërguar një letër në Hagë, e cila ka shkaktuar një situatë të re në komplet gjykimin ndaj Thaçit dhe të tjerëve.

Nacionale ka parë dokumentin e dorëzuar nga avokatët e krerëve të UÇK-së të cilët kanë kërkuar që letra e këtij dëshmitari, të hetohet nga një hetues i pavarur, e jo Prokuroria e Specializuar. Madje, thuhet se pretendimet mund të jenë fatale për besueshmërinë e tij, dhe provave për gjykim.

“Mbrojtja për z. Hashim Thaçi, Kadri Veseli, Rexhep Selimi dhe Jakup Krasniqi (“Mbrojtja”) kërkon nga Trupi Gjykues që të caktojë një hetues të hetojë pretendimet e përfshira në një mesazh të marrë nga ZPS në lidhje me W04577 (“Letra W04577”). Pretendimet e përfshira në mesazh ndikojnë drejtpërdrejt dhe janë potencialisht fatale për besueshmërinë e W04577. Identiteti i autorit të letrës W04577 është nga ana tjetër i domosdoshëm për çdo hetim mbi vërtetësinë e tyre”, thuhet në këtë parashtrim.

“Prandaj, meqenëse mbrojtja nuk është në gjendje të kryejë vetë hapat e nevojshëm hetimor për shkak të redaktimeve të autorizuara nga Trupi Gjykues, dhe Prokuroria është më tej në një situatë konflikti interesi pasi çështja e saj kundër katër të akuzuarve mbështetet, ndër të tjera, në besueshmërinë e W04577 , Mbrojtja kërkon që të caktohet një hetues i pavarur me qëllim që (i) të hetojë pretendimet e përfshira në Letër; (ii) të përgatisë një raport mbi rezultatin e hetimeve të tilla dhe (iii) t’i zbulojë Panelit dhe Palëve çdo material të marrë prej tij që bie nën Rregullat 102-103”, thuhet më tutje,

Për dëshmitarin 29 në rastin e krerëve të UÇK-së, ish-avokati i Kadri Veselit, Ben Emmerson, thoshte se ka kërkuar pako përfitimi në këmbim të dëshmisë. Por, ky nuk ishte zhvillimi i vetëm problematik në Hagë që ndërlidhet me këtë dëshmitar.

“Më duket se ka lidhje me dëshmitarin e radhës. Nuk e di nëse keni pasur mundësi të shihni shënimet përgatitore apo korrigjuese të dëshmitarit, por iu lutem të shihni shënimin përgatitor numër dy. Në këtë shënim është një përmbajtje, një përshkrim i një, është bërë një përpjekje nga dëshmitari të negociojë diçka me prokurorinë para se të jap dëshmi, është paragrafi 1 dhe 12. Diskutohet diçka lidhur me atë që është premtuar në të shkuarën, dhe cfarë nuk është premtuar, dhe ka një kontradiktë të qartë mes asaj që është premtuar, dhe z.Pache, ka një kontradiktë mes asaj që ai thotë se është pretenduar, dhe asaj që pretendon Pache”, tha Emmerson, raporton Nacionale.

Vetë dëshmitari në seancë, nuk pranonte se një nënshkrim ishte i tij.