Jo çdo ushqim që është i sigurt për njerëzit është i tillë edhe për kafshët. Shpesh, nga padituria apo dashuria për ta, u japim atyre ushqime që mund të jenë shumë të rrezikshme.

Nëse kafsha juaj konsumon aksidentalisht ndonjërën nga ushqimet e mëposhtme, kontaktoni menjëherë veterinerin.

 Ja disa prej më të zakonshmeve që duhet rreptësisht t’i shmangni:

Çokollata, kafeja, kafeina

Çokollata përmban teobrominë , një kimikat që është toksik për qentë kur konsumohet prej tyre në sasi të konsiderueshme. Ajo gjithashtu përmban kafeinë, e cila gjendet edhe te çaji, kafeja dhe në soda të tjera (p.sh. coca-cola, sprite, etj).

Llojet e ndryshme të çokollatave kanë në përmbajtje sasi të ndryshme të teobromine dhe kafeine. Për shembull, çokollata e zezë ka në përbërje më shumë nga përbërësit e sipërpërmendur, sesa çokollata me qumësht. Si rrjedhojë, nëse një qen konsumon çokollatë me qumësht ka më shumë gjasa të toksikohet sesa nëse konsumon çokollatë të zezë.

Gjithsesi, edhe pak gramë çokollatë, mund të rezultojnë me rrezik në një qen të vogël, kështu që asnjë sasi apo lloj çokollate nuk duhet të konsiderohet “ e sigurt” për t’ia dhënë qenit tuaj.

Toksikimi nga çokollata mund të shkaktojë të vjella, diarre dhe aritmi, acarim, nervozizëm, dridhje dhe shenja epilepsie. Ngordhja mund të ndodhë brenda 24 orëve pasi është konsumuar, transmeton Telegrafi.

Kockat e vogla të pulës

Mund të thyhen dhe të shkaktojnë mbytje ose dëmtime në traktin tretës.

Rrushi

Si rrushi i freskët, ashtu edhe rrushi i thatë, mund të shkaktojnë papritur një mosfunksionim të veshkave te macet dhe qentë. Ende nuk është vërtetuar se cili është agjenti toksik në këto fruta që shkakton këtë problem.

Megjithatë, shenjat klinike mund të shfaqen që 24 orët e para pas konsumimit. Ato shfaqen me të vjella, diarre dhe letargji (lodhje) të përgjithshme.

Shenja të tjera, kanë të bëjnë me mosfunksionim total të veshkave.

Hudhra dhe qepa

Hudhra dhe qepa kanë në përbërjen e tyre kimikate që dëmtojnë qelizat e rruazave të kuqe të gjakut te qentë dhe macet. Qelizat e prekura të gjakut, mund të humbasin aftësinë për të transportuar oksigjenin në mënyrë efektive.

Të freskëta apo të gatuara, këto produkte janë njësoj të rrezikshme për qentë dhe macet.

Avokado

Përmban një substancë të quajtur persinë, e cila është e dëmshme për zogjtë, qentë dhe disa lloje kafshësh të tjera.

Kafeina dhe alkooli

Shumë të rrezikshme dhe mund të shkaktojnë shqetësime të mëdha neurologjike e kardiake.

Ëmbëlsuesit artificialë (si ksilitoli)

Gjinden zakonisht në çamçakëz, ëmbëlsira apo pasta dhëmbësh. Mund të shkaktojnë rënie të menjëhershme të sheqerit në gjak dhe probleme serioze në mëlçi.