Ukraina paralajmëroi të martën kundër çdo pjesëmarrjeje të trupave të huaja në paradën e Rusisë më 9 maj për të shënuar 80 vjetorin e mposhtjes së Gjermanisë naziste, duke thënë se kjo do të ishte “e papranueshme” dhe do të shihej si ndihmë për Moskën për të “’pastruar’ krimet e saj të luftës”.

Sipas mediave të huaja, përcjell Telegrafi, një numër i vogël vendesh kanë dërguar ushtritë e tyre vitet e fundit për të marrë pjesë në paradën tradicionale të Rusisë më 9 maj – një ngjarje që është bërë festa më e rëndësishme publike e vendit në çerek shekulli në pushtet të presidentit Vladimir Putin.

“Ushtria ruse ka kryer dhe vazhdon të kryejë mizori në Ukrainë në një shkallë që Evropa nuk e ka parë që nga Lufta e Dytë Botërore”, tha ministria e jashtme e Kievit.

“Është kjo ushtri që do të marshojë në Sheshin e Kuq në Moskë më 9 maj. Këta njerëz nuk janë çlirimtarë të Evropës, ata janë pushtues dhe kriminelë lufte”.

Kievi theksoi se marshimi me ushtarët rusë do të konsiderohej si “ndarje e përgjegjësisë” për veprimet e Moskës gjatë pushtimit të saj trevjeçar të Ukrainës.

“Të marshosh krah për krah me ta do të thotë të ndash përgjegjësinë për gjakun e fëmijëve, civilëve dhe ushtarakëve të vrarë ukrainas, jo të nderosh fitoren ndaj nazizmit”.

Ukraina ishte një nga vendet më të shkatërruara gjatë Luftës së Dytë Botërore, me Kievin që tha se “preku çdo familje ukrainase”.

Ministria e jashtme tha gjithashtu se gjashtë milionë ukrainas luftuan në Ushtrinë e Kuqe – me pesë milionë civilë ukrainas të vrarë dhe tre milionë trupa ukrainase.

Por udhëheqësi rus Vladimir Putin e atribuoi fitoren ndaj nazizmit në Evropë si një sukses të arritur kryesisht nga kombi rus.

Siç kujtojnë më tej mediat, trupat e Azisë Qendrore kanë marrë shpesh pjesë në paradën e Moskës.

Dhe Kremlini këtë vit nuk e ka përjashtuar që ushtarët e Koresë së Veriut të marrin pjesë për herë të parë, pasi trupat e Phenianit ndihmuan Moskën të dëbonte ushtarët ukrainas nga rajoni Kursk i Rusisë.