Pas dështimit të gjashtë me radhë për konstituimin e Kuvendit të Kosovës, njohës të çështjeve juridike dhe politike po kërkojnë që Presidentja Vjosa Osmani të iniciojë një rast në Gjykatën Kushtetuese për të dhënë një interpretim të ri kushtetues që do të ndihmonte në zhbllokimin e kësaj situate.

Pse Kuvendi nuk po konstituohet?

Që nga zgjedhjet parlamentare të 9 shkurtit 2025, Kuvendi i ri nuk ka arritur të zgjedhë kryetarin e tij, një hap kyç për konstituimin e legjislaturës së nëntë. Kandidatja e Vetëvendosjes, Albulena Haxhiu, ka marrë vetëm 57 vota, nga 61 të nevojshme, në katër tentime të njëpasnjëshme.

Njohësit kërkojnë sqarim kushtetues

Mazllum Baraliu, profesor i së drejtës kushtetuese, tha për KosovaPress se Presidentja ka të drejtë kushtetuese të kërkojë interpretim nga Gjykata Kushtetuese, duke theksuar se ngërçi nuk mund të vazhdojë pafundësisht. Sipas tij, vetëm një vendim i qartë nga Kushtetuesja mund të përcaktojë se çfarë ndodh kur partia fituese nuk arrin të zgjedhë kryetarin e Kuvendit.

Rregullat kushtetuese janë të paqarta

Aktgjykimi i Kushtetueses i vitit 2014 përcakton se partia fituese ka të drejtë ekskluzive për të propozuar kandidatin për kryetar të Kuvendit, por nuk specifikon çfarë ndodh nëse ai/ajo nuk arrin të sigurojë votat e nevojshme.

Eugen Cakolli nga Instituti Demokratik i Kosovës (KDI) theksoi se Gjykata Kushtetuese nuk jep opinione ligjore mbi mënyrën e veprimit, por merr në shqyrtim vetëm raste konkrete. Sipas tij, edhe 30 deputetë mund të iniciojnë një rast, por aktualisht mungon një vendim i qartë nga Kuvendi që do të mundësonte një interpretim kushtetues.

Vetëvendosje mbetet e pa lëkundur në kandidaturën e Haxhiut

Pavarësisht mungesës së mbështetjes së mjaftueshme, Lëvizja Vetëvendosje ka deklaruar se do të vazhdojë të propozojë Albulena Haxhiun për kryetare të Kuvendit. Megjithatë, ka theksuar nevojën për një marrëveshje politike, e cila aktualisht duket larg për shkak të mospajtimeve mes partive opozitare dhe komuniteteve jo-shumicë, raporton KosovaPress.

Seanca e shtatë, të dielën më 27 prill

Përpjekja e radhës për zgjedhjen e kryetarit të Kuvendit do të bëhet të dielën, më 27 prill, në një seancë të thirrur për orën 10:00. Nëse dështon sërish, kërkesa për ndërhyrje të Gjykatës Kushtetuese pritet të intensifikohet.

tema e plotë në sistemin me parapagim./Kosovapress/