Kështu konfirmoi Osama Hamadan, përfaqësues i Hamasit në Liban, në një konferencë për shtyp në Bejrut të transmetuar nga “Al-Jazeera” pas fjalëve të kryeministrit izraelit Benjamin Netanyahu, sipas të cilit “Hamasi nuk do të mbijetojë në Gaza”.

Prej orësh ka pasur lajme për praninë e përfaqësuesve të Hamasit në Kajro nesër ose në ditët në vijim. Orët e fundit faqja izraelite e lajmeve Ynet, duke cituar gazetën “Al Araby Al Jadeed”, raportoi se lideri politik i Hamasit, Ismail Haniyeh, do të jetë nesër në kryeqytetin egjiptian.

Kryeministri izraelit Benjamin Netanyahu ka hedhur poshtë kushtet e propozuara të Hamasit për armëpushim duke thënë se “fitorja totale” në Gaza është e mundur brenda disa muajsh.

Ai foli pasi Hamasi parashtroi një sërë kërkesash në përgjigje të një propozimi të armëpushimit të mbështetur nga Izraeli.

Ai tha se negociatat me grupin “nuk po shkonin askund” dhe i përshkroi kushtet e tyre si “të çuditshme”.

Bisedimet mes negociatorëve po vazhdojnë.

“Nuk ka zgjidhje tjetër përveç një fitoreje të plotë dhe përfundimtare”, tha Netanyahu në një konferencë për shtyp të mërkurën.

“Nëse Hamasi do të mbijetojë në Gaza, është vetëm një çështje kohe deri në masakrën e ardhshme”.

Agjencia e lajmeve “Reuters” citoi një zyrtar të lartë të Hamasit të ketë thënë se komentet e Netanyahu mbi propozimin e armëpushimit tregojnë se ai synon të vazhdojë konfliktin në rajon.

Hamasi është i përgatitur të merret me të gjitha opsionet, citohet të ketë thënë zyrtari.

Më herët, Hamasi paraqiti një sërë kërkesash, duke përfshirë shkëmbimin e pengjeve për të burgosurit palestinezë dhe rindërtimin e Gazës, në përgjigje të një propozimi për armëpushim të mbështetur nga Izraeli.

Grupi i armatosur kërkon një tërheqje të plotë të forcave izraelite dhe përfundimin e luftës pas tre periudhave 45-ditore të armëpushimit.

Oferta ka të ngjarë të jetë e papranueshme për kryeministrin izraelit, i cili ka bërë thirrje për “fitore totale” në Gaza.

Pyetja është nëse mund të arrihet një rrugë e mesme për të çuar përpara procesin.

Një draft i dokumentit të Hamasit i parë nga agjencia e lajmeve “Reuters” sugjeron:

Faza e parë: Një pauzë 45-ditore në luftime gjatë së cilës të gjitha gratë izraelite pengje, meshkujt nën 19 vjeç, të moshuarit dhe të sëmurët do të shkëmbeheshin me gra dhe fëmijë palestinezë të mbajtur në burgjet izraelite. Forcat izraelite do të tërhiqen nga zonat e banuara të Gazës dhe do të fillonte rindërtimi i spitaleve dhe kampeve të refugjatëve

Faza e dytë: Pengjet e mbetur meshkuj izraelitë do të shkëmbeheshin me të burgosur palestinezë dhe forcat izraelite do të largoheshin plotësisht nga Gaza

Faza e tretë: Të dyja palët do të shkëmbenin eshtrat dhe trupat

Marrëveshja do të shihte gjithashtu rritjen e dërgesave të ushqimit dhe ndihmave të tjera në Gaza. Deri në fund të pauzës 135-ditore të luftimeve, Hamasi thotë se negociatat për t’i dhënë fund luftës do të kishin përfunduar.

Propozimi mori një përgjigje të vakët nga presidenti amerikan Joe Biden, i cili e quajti atë “pak mbi krye”. Sekretari i Shtetit Antony Blinken tha se kishte ende “shumë punë për të bërë” për të arritur një armëpushim të përhershëm, por theksoi rëndësinë e arritjes së një paqeje të qëndrueshme.

Një armëpushim i mëparshëm njëjavor në nëntor bëri që rreth 100 pengje u liruan në një shkëmbim me 240 të burgosur palestinezë.

Rreth 1 mijë e 300 njerëz u vranë gjatë sulmeve të Hamasit në Izraelin jugor më 7 tetor të vitit të kaluar.

Më shumë se 27 mijë e 700 palestinezë janë vrarë dhe të paktën 65 mijë janë plagosur nga lufta e nisur nga Izraeli si përgjigje, sipas ministrisë së shëndetësisë të drejtuar nga Hamasi.