“Elektroserveri nuk duhet të pranohet kurrsesi. Nëse KEDS-i nuk i mbledh faturat në veri, atëherë duhet të kthehet në pronë publike shpërndarja edhe furnizimi, nëse nuk e bën KEDS-i duhet qeveria”.
Kështu deklaronte nga foltorja e Kuvendit të Kosovës, opozitari Albin Kurti, më 21 qershor 2018, shkruan Demokracia.com.
https://www.facebook.com/demokraciacom/videos/915273840222559
Por, vetëm pak vite më vonë, në vitin 2022 nga pozita e kryeministrit të Kosovës, Albin Kurti, e kishte zhbërë këtë qëndrim opozitar. Ai e kishte përshëndetur marrëveshjen e arritur në dialogun e udhëhequr prej tij për zbatimin e të njëjtës marrëveshje, të cilën e kishte kundërshtuar më herët.
Në deklarimin e tij, ai ka thënë se kjo marrëveshje do të mundësojë që të gjithë qytetarët të trajtohen në mënyrë të barabartë. Sipas tij, kjo ujdi e arritur në mes të të dyja palëve, do të mundësojë edhe ruajtjen e buxhetit.
“Ka qenë një dëmtim i madh i buxhetit, një padrejtësi e jashtëzakonshme që na është bërë në këto vite, andaj me këtë dakordim po i vjen fundi dhe po mundësohet që për energjinë e konsumuar edhe të paguhet ajo energji nga të gjithë qytetarët, ashtu që të gjithë të jemi të barabartë dhe të mos dëmtohet buxheti”, deklaronte Kurti.
Si rezultat i marrëveshjes së dialogut të drejtuar nga kryeministri Kurti, KEDS-i dhe kompania serbe, Elektroserver, kanë nënshkruar kontratë komerciale.
Lajmin për këtë zhvillim e ka dhënë më 9 dhjetor 2023 i dërguari special i BE-së për dialogun Kosovë – Serbi, Miroslav Lajçak. “Ky është një hap i rëndësishëm në zbatimin e Udhërrëfyesit për Energjinë të lehtësuar nga BE-ja dhe në rrugën e normalizimit të marrëdhënieve ndërmjet Kosovës dhe Serbisë. Urime për të gjithë ata që e bënë të mundur”, njoftoi Lajçak.
Me Marrëveshjen për Energjinë, sipas Kurtit dhe Vetëvendosjes legalizohet ndikimi i Serbisë në Kosovë. /Demokracia.com/
