Sipas Ministrisë së Shëndetësisë të Gazës, e drejtuar nga Hamasi, sulmi i nisur nga ushtria izraelite mbrëmjen e së premtes së 3 nëntorit pranë spitalit al-Shifa, më i madhi në Gaza, shkaktoi 15 të vdekur.

Izraeli konfirmoi se kishte shënjestruar një autokolonë ambulance në zonë, duke shpjeguar se ajo po përdorej “nga një celulë terroriste e Hamasit”.

Sekretari i Përgjithshëm i Kombeve të Bashkuara, Antonio Guterres tha se ishte “i tmerruar” nga sulmi.

Të shtunën në mëngjes, media izraelite raportoi fjalët e një burimi amerikan sipas të cilit Hamasi ishte “përpjekur të nxirrte luftëtarët e tij nga Gaza nëpërmjet Rafah me ambulanca, duke ngadalësuar kështu përpjekjet për evakuimin e të huajve”.

“Hamasi i dha Egjiptit dhe SHBA-ve një listë të personave të plagosur rëndë, të cilët donin të evakuonin së bashku me qindra të huaj që prisnin të largoheshin”, tha burimi.

Ai shtonte se SHBA-të dhe Egjipti më pas zbuluan se “një e treta e emrave ata ishin luftëtarë, asnjë prej të cilëve nuk ishte në mesin e 76 palestinezëve të plagosur dhe përfundimisht të evakuuar”.

Fotografi palestinez, Abdul Hakim Abu Reyash, përshkroi skenën pas sulmit.

Abdul Hakim tha se shpërthimi goditi të dy njerëzit që qëndronin përpara spitalit dhe ata që po transportoheshin me ambulanca pasi kishin pësuar lëndime në sulmet e mëparshme izraelite.

“Spitali Shifa përmban shumë refugjatë – që vlerësohet në mes 60-80 mijë refugjatë”, tha ai.

“Të gjithë ata janë civilë dhe ky është një tjetër krim i kryer nga pushtimi izraelit kundër civilëve në Gaza”.

Drejtori i Përgjithshëm i Organizatës Botërore të Shëndetësisë (OBSH) Tedros Adhanom Ghebreyesus tha më herët se ai ishte “plotësisht i tronditur” nga sulmi.