Shefi i grupit parlamentar të PDK-së, Abelard Tahiri, tha se janë duke e analizuar vendimin e presidentes Vjosa Osmani për mosdekretimin e kryeprokurorit të shtetit.

Ai tha se opozita nuk do të ketë betejë politike, por betejë kushtetuese. “Ajo veç se e ka humbur”, tha Tahiri për Osmanin.

“Edhe këtu presidentja tregoi që nuk është e paanshme. Nuk është për presidenten që të bëjë politikë me opozitën. Presidentja po na kërkon betejë politike, por ne do t’i japim betejë kushtetuese ”, tha ai.

Për mosdektretimin e kryeprokurorit tha se janë duke bërë një analizë për ta parë se ku janë shkeljet në këtë rast.

Ai tha se Osmani ka bërë shkelje serioze sa i përket kësaj çështje dhe se ato shkelje, sipas tij, “mund ta çojnë në shtëpi”, raporton EO.

“Ne e kemi theksuar që na duhet një kohë që ta bëjmë një analizë ku tregohet se a ka shkaktuar shkelje presidentja. Tashmë e dimë që ajo ka bërë dy shkelje serioze, duke mosdekretuar për 18 muaj kryeprokurorin e shtetit dhe e dyta mosdekretimi i kryeprokurorit. Draftin do ta kemi gati nesër sa i përket kësaj çështje dhe do ta shpërndajmë. Nuk jemi për mi pri bajrakut sa i përket kësaj çështje”.