Kryeministri i Kosovës, Albin Kurti, pas një kohe po rikthehet në kryeqendrën evropiane, në Bruksel, për t’u ulur në tryezën e dialogut me presidentin e Serbisë, Aleksandër Vuçiq.
Herën e fundit kur ishte në Bruksel, më 27 shkurt, Kurti pranoi propozimin franko-gjerman, i njohur ndryshe si Plani Evropian apo edhe si Marrëveshja Bazë, e cila përbëhet nga 11 Nene, disa prej të cilëve janë llogaritur tepër problematike. Kjo marrëveshje ka edhe pjesën e saj integrale që njihet si Aneksi i Ohrit (18 mars 2023).
Në Aneksin e Ohrit, të dyja palët, Kosova dhe Serbia janë pajtuar që Marrëveshja dhe Aneksi i zbatimit bëhen pjesë integrale e proceseve përkatëse të anëtarësimit të Kosovës dhe Serbisë në BE, shkruan Demokracia.com.
Marrëveshjet e pranuara nga Kurti janë kundërshtuar fuqishëm në Kosovë. Në mesin e zëra kritikë është edhe ish-kryetari i Gjykatës Kushtetuese të Kosovës, Enver Hasani, i cili ka folur vetëm pak ditë pas takimit të Ohrit.
Hasani ka tronditur Kosovën kur ka thënë se kryeministri Albin Kurti me këtë marrëveshje e ka lënë mundësinë që statusi i Kosovës të rinegociohet në të ardhmen.
“E para: e ka lënë çështjen e statusit potencialisht në bisedë në të ardhmen mu rihap e mu diskutu me shtetin serb. E dyta i ka dhënë vulë në nivel të BE-së se ka marrë detyrim për t’i legalizuar këtë edhe të gjitha marrëveshjet e tjera që nuk janë zbatuar ose janë zbatuar gabim. E treta bëhet fjalë për autonomi territoriale.”, tha Hasani.
Hasani ka thënë se marrëveshja mes kryeministrit kosovar Albin Kurtit dhe presidentit serb Aleksandër Vuçiq ka lëvizur shtyllat e shtetësisë së Kosovës.
Hasani ka qenë kritikë edhe në rastet tjera. Ai ka para ngjashmëri të marrëveshjes së Brukselit dhe Ohrit, mes Kurtit dhe Vuçiqit, me idetë e akademikut famëkeq serb Dobrica Qosiç. /Demokracia.com/
