Zyrtarët e inteligjencës amerikane janë dyshues për një kundër-ofensivë të mundshme ukrainase, duke besuar se ajo mund të arrijë vetëm “përparime modeste territoriale”, sipas një dokumenti të klasifikuar të zbuluar, raportoi të martën Washington Post.

Dokumenti u publikua së bashku me shumë dokumente të tjera të klasifikuara të publikuara nga New York Times të enjten.

Njëra prej tyre i referohet gjendjes së konfliktit në Ukrainë në fillim të marsit, të tjerat flasin për situatën në disa fronte, si Bakhmut, ose për mbrojtjen kryesore kundërajrore të Kievit. Një kundërofensivë e madhe ukrainase pritet këtë pranverë.

Ukraina siguron se ka krijuar brigada sulmi dhe ka krijuar rezerva municionesh, duke u përpjekur të kursejë njëkohësisht ushtarët e saj dhe të lodhë forcat kundërshtare në front, përpara ofensivës së paralajmëruar. Ajo mori gjithashtu tanke dhe artileri me rreze të gjatë nga Perëndimi.

Por mbrojtja e vendosur e Rusisë dhe “mungesat e vazhdueshme të Ukrainës në lidhje me grumbullimin e trupave dhe trajnimin e tyre, si dhe rezervat e municioneve, ka të ngjarë të testojnë ashpër çdo përparim dhe të rrisin humbjet në sulm”, sipas dokumentit të klasifikuar, publikuar nga Washington Post.

Përveç kësaj, një dokument tjetër i zbuluar thotë se presidenti egjiptian Abdel Fatah al-Sisi urdhëroi prodhimin e 40,000 raketave që t’i dorëzoheshin Rusisë, duke u kërkuar autoriteteve ta mbajnë sekret “për të shmangur problemet me Perëndimin”, tha gazeta në një artikull tjetër.

Por SHBA-ja e mohoi atë informacion, duke specifikuar se “nuk ka asnjë tregues se një projekt i tillë është zbatuar“, sipas një zyrtari të lartë amerikan.

“Egjipti është një partner i ngushtë dhe ne bashkëpunojmë rregullisht me udhëheqësit e tij për një gamë të gjerë çështjesh rajonale dhe botërore,” tha zyrtari i lartë.

Fotografitë e dokumenteve të shumta të klasifikuara janë postuar ditët e fundit në Twitter, Telegram, Discord dhe platforma të tjera, disa prej të cilave kanë qarkulluar në internet prej javësh përpara se të fitojnë vëmendjen e mediave.

Pentagoni vlerësoi se rrjedhja e këtyre dokumenteve ishte një rrezik “shumë i lartë” për sigurinë kombëtare amerikane.

Shumë nga këto dokumente nuk janë më të disponueshme dhe autoritetet amerikane po punojnë për t’i hequr të gjitha nga interneti.