Policia e Kosovës ka dënuar një shofer me konfiskim njëvjeçar të patentë shoferit, 500 euro gjobë dhe pesë pikë negative, pasi që ka vozitur me shpejtësi 125 km/h në rrugën në të cilën shpejtësia e lëvizjes është 40 km/h.

Në njoftimin e Policisë thuhet se rasti ka ndodhur në rrugën Gjilan-Ferizaj.

Njoftimi i plotë i Policisë së Kosovës:

Tejkalim i shpejtësisë, kundërvajtësit i merret patentë shoferi për një vit

Gjilan, 16 janar 2023

Drejtoria Rajonale e Policisë Gjilan, Njësiti Rajonal i Komunikacionit Rrugor Gjilan me datën 15.01.2023 në kuadër të zbatimit të Planit Operativ ,,Siguria në trafikun rrugor’’ me qëllim të parandalimit të aksidenteve të trafikut e me theks të veçantë atyre me fatalitet, ka mbajtur pikë kontrolli të automjeteve në rrugën Gjilan-Ferizaj.

Në këtë pikë të kontrollit ka hasur në një kundërvajtës i në zonën ku kufizimi i shpejtësisë së lejuar është dyzet (40) km/h duke vozitur me shpejtësinë njëqind e njëzet e pesë (125) km/h.

Të njëjtit i është shqiptuar gjoba në vlerë prej pesëqind (500) eurove, konfiskuar patentë shoferi me masa e përkohshëm e ndalim vozitjes në afat prej një (1) viti dhe pesë (5) pikë negative.

Drejtoria Rajonale e Policisë në Gjilan, apelon vozitësit që të i respektojnë normat dhe ligjet e trafikut rrugor, po ashtu inkurajon mediat dhe qytetarët që për të gjitha kundërvajtjet që mund të shkaktohen në komunikacion të njoftojnë Stacionin më të afërm të Policisë, apo përmes aplikacionit digjital “Lajmëro Policinë’’, E-mail: [email protected]  dhe numrat kundestarë:192; 0385045047001.

Të dhënat e juaja do të ruhen ne konfidencialitet të plotë.