Me iniciativë të presidentes së Republikës së Kosovës, Vjosa Osmani, sot dhe nesër në Prishtinë i zhvillon punimet Forumi Ndërkombëtar për Gratë, Paqen dhe Sigurinë, një organizim i pari i këtij lloji në historinë e Kosovës.
Forumi organizohet në bashkëpunim me zëvendëskryeministren dhe Ministren e Punëve të Jashtme, Donika Gërvalla Schwarz dhe mbështetet nga partnerë vendorë dhe ndërkombëtarë.
Sipas komunikatës së Presidencës, në edicionin e parë të tij, WPS, pritet të grumbullojë mbi 400 pjesëmarrës, nga vende të ndryshme të botës, në fokus të të cilit do të jetë trajtimi i çështjeve që ndërlidhen më gratë, paqen dhe sigurinë.
“Në këtë Forum, pritet të marrin pjesë liderë botërorë, ekspertë, akademikë, përfaqësues të shoqërisë civile, të rinj dhe përfaqësues nga grupe të tjera të interesit. Forumi synon të diskutojë jo vetëm sfidat në përballje me paqen dhe sigurinë globale, por edhe trajtimin dhe zgjidhjet eventuale. Ndryshe, WPS është Forum, i cili paraqet një nga zotimet e institucioneve të Republikës së Kosovës për Samitin për Demokraci, të organizuar nga presidenti i SHBA-ve, Joe Biden”, thuhet në komunikatë.
Demokracia.com ka siguruar agjendën e plotë të këtij forumi.
Sipas agjendës duket se Osmani nuk ka marrë ndonjë konfirmim lidhur me ftesën që i kishte bërë presidentit amerikan Joe Biden, që të jetë pjesë e këtij forumi përmes një videomesazhi.
LEXO EDHE:
DOKUMENT| Osmanit i vjen vetëm një president në Kosovë, kjo është agjenda e forumit që nis nesër
Presidentja e Kosovës, Vjosa Osmani ka thënë se temë e këtij forumi do të jetë ndërtimi i aleancave për paqe të qëndrueshme.
“Temë e edicionit të parë të Forumit Ndërkombëtar për Gratë Paqen dhe Sigurinë do të jetë ndërtimi i aleancave për paqe të qëndrueshme, me të cilën synojmë të reflektojmë mbi sukseset si dhe sfidat e agjendës të Rezolutës 13/25. Forumi është edhe platformë për rritjen e ndërgjegjësimit për nevojë për të njohur dhe promovuar aftësitë e grave e vajzave, për të kontribuar në mënyrë thelbësore në proceset e paqes dhe të sigurisë”, theksoi ajo.
Presidentja e vendit duke dhënë detaje para fillimit të këtij forumi, tha se paqja dhe siguria e grave janë shtylla qendrore të vizionit të Kosovës.
“Ky forum synon të përcjellë qartë mesazhin se paqja dhe siguria e grave janë shtylla qendrore të vizionit të Kosovës për paqe të qëndrueshme në nivel lokal, rajonal si dhe global. Edicioni i parë i forumit do t’i kushtohet trashëgimisë të ish-sekretares amerikane Madeleine Albright, mikes së madhe të Kosovës, e cila iku në amshim muaj më parë… Forumi do të grumbullojë 126 folës nga 33 shtete të botës nga të gjashtë Kontinentet dhe mbi 400 pjesëmarrës”, tha ajo.
LEXO EDHE:
Në kuadër të forumit do të mbahen 16 panele, ndërsa hapja zyrtare do të jetë nesër në orën 9:00 në Prishtinë.
LEXO EDHE:
Osmani injoron deputetet gra të Kosovës, s’ftohet as kryetarja e komisionit kryesor për sigurinë
