Kryetari i Kievit, Vitali Klitschko, ka thënë se vendi i tij do të hyjë në bisedimet e paqes vetëm pasi “ushtari i fundit rus të largohet nga Ukraina”.

Ish-kampioni botëror i boksit në peshat e rënda po merrte pjesë të shtunën në funeralin e një aktivisti të njohur 24-vjeçar kundër korrupsionit, i kthyer në luftëtar vullnetar, Roman Ratushnyi, i cili u vra në Izyum, në rajonin e Kharkivit, në fillim të këtij muaji.

Disa zyrtarë ukrainas kanë shprehur shqetësime se aleatët perëndimorë mund ta shtyjnë vendin e tyre drejt një marrëveshjeje paqeje me Rusinë në dritën e pasojave të vazhdueshme nga lufta për furnizimet me ushqime dhe energji dhe ekonominë globale.

Kur u pyet Klitschko nëse ai ishte i shqetësuar se mund t’i bëhet presion Ukrainës për të bërë lëshime ndaj rusëve, ai u përgjigj:

“Rusët folën për ‘le të gjejmë një kompromis. Le të gjejmë një zgjidhje’. Për çfarë po flasin? Cilin kompromis? T’i japësh rusëve pjesë të territorit ukrainas nuk është një kompromis. Jam më se i sigurt se do të jemi gati të bisedojmë me rusët për ndonjë kompromis. Nëse ushtari i fundit rus u largua nga Ukraina, do të jetë koha për të folur, por jo ende. Rusët duhet të ikin nga atdheu ynë”, ka thënë Klitschko për BBC-në.

Si një nga ukrainasit më të njohur në botë, zëri i Klitschkos ka peshë, por vendimi përfundimtar nëse dhe kur do të hyjë në bisedimet e paqes do të varet nga presidenti Volodymyr Zelensky dhe qeveria e tij.