Sot deputetët e Kuvendit të Kosovës kanë kaluar në lexim të parë Ligjin për Pagën Minimale në të cilin janë përjashtuar veteranët e luftës së Ushtrisë Çlirimtare të Kosovës.

Pasi la jashtë këtij ligji veteranët e UÇK-së, kryeministri Albin Kurti është lavdëruar për kalimin e këtij ligji, shkruan Demokracia.com.

Ai përmes një postimi në profilin e tij zyrtar në rrjetin social Facebook, me mburrje thotë se për herë të parë pas 11 vitesh është rritur paga minimale, pavarësisht se i ka lënë anash veteranët.

Postimi i plotë i Kurtit, pa ndërhyrje:

Lajm i mirë për qytetarët që sot Kuvendi i Republikës miratoi në lexim të parë të ligjin për rritjen e pagës minimale në 264 euro dhe lirimin nga tatimi i të ardhurave deri në pagën minimale. Mbi 100 mijë punëtorë të sektorit privat, përfitojnë rritje mbi 100%, respektivisht mbi 50% të pagës së tyre mujore, ndërkaq plotë 380 mijë punëtorë të sektorit privat dhe publikë përfitojnë prej lirimit nga tatimi i të ardhurave deri në shumën e pagës minimale. Përveç se po e rrisim pagën minimale për herë të parë pas 11 vitesh, po rrisim atë më shumë se çdoherë tjetër më parë. Ndërkaq pragun e shkallës tatimore po e zhvendosim nga 80 euro në 250 euro.

Gjithashtu, i uroj punë të mbarë anëtarëve të sapozgjedhur të Komisionit për Autoritetin e Konkurencës, që për herë të parë udhëhiqet nga një grua. Ky institucion ka rëndësi të madhe në mbrojtjen e konkurrencës së lirë dhe efektive në vend. Rëndësia e tij rritet edhe më shumë tani që po përballemi me një periudhë inflacioni.

E nga sot, me miratimin e Projektligjit për Provimin e Jurisprudencës, për herë të parë këtij provimi do të mund t’i nënshtrohen edhe kandidatë nga trojet tjera shqiptare, duke përfshirë këtu shqiptarët e Preshevës, Medvegjës dhe Bujanocit. /Demokracia.com/