Presidenti i Federatës së Futbollit të Kosovës, Agim Ademi ka reaguar pas vendimit të UEFA-s që kampioni i Kosovës në futboll këtë edicion të marrë pjesë direkt në rrethin e parë kualifikues.

Kampioni i Kosovës që do shpallet në fund të këtij edicioni nuk do të luajë më rundin parakualifikues, por direkt në rrethin e parë të kualifikimeve, shkruan Demokracia.com.

I pari i shtëpisë së futbollit kosovar, Agim Ademi ka thënë se përparimi i Ligës, përfaqësimi me më shumë klube në garat evropiane dhe rritja e cilësisë është dëshmi se futbolli i Kosovës po shënon rritje në çdo aspekt.

E sipas Ademit, rritja e futbollit të Kosovës është mision kryesor i Federatës që ai drejton.

Kujtojmë se këtë edicion në garat evropiane marrin pjesë katër skuadra të Superligës së Kosovës. Vendi i parë, vendi i dytë, vendi i tretë dhe fituesi i Kupës do të sigurojnë kalimin në garat evropiane.

Postimi i plotë i Agim Ademit:

Meqë jemi në fazën përfundimtare të garave kampionale, dhe kohës kur do të përcaktohen klubet që do ta përfaqësojnë futbollin tonë në garat evropiane, konfirmohet edhe një lajm i mirë për futbollin tonë.

Siç u pa edhe në ranglistën e fundit të UEFA-s, për renditjen e ligave kombëtare, liga e Kosovës ka shënuar përparimin e radhës. Dhe në bazë të këtij përparimi, konfirmohet lajmi qe ne FFK-ja e ka dhënë edhe para fillimit të edicionit, se nga ky edicion, liga jonë do të përfaqësohet me 4 klube. 3 nga kampionati dhe fituesi i kupës.

Mirëpo risia tjetër është se si rezultat i ngritjës së rangimit të ligës, kampioni i Kosovës nga ky edicion nuk do të garoj në rundin para kualifikues, por direkt në rundin e parë kualifikues të Ligës së Kampionëve.

Përparimi i Ligës, përfaqësimi me më shumë klube në garat evropiane dhe rritja e cilësisë në kuadër të garimit tê brendshëm, është një tjetër deshmi se futbolli i Kosovës po shënon rritje në çdo aspekt, që është edhe mision kryesor i Federatës së Futbollit të Kosovës dhe Presidentit Agim Ademi./Demokracia.com/