Stërvitja e përbashkët taktike e ushtrisë serbe me qitje luftarake natën “Mburoja e Zjarrit 2022” është mbajtur sonte në terrenin stërvitor “Pasuljanska livada” afër Çuprisë.

Çuprija është vetëm 140 kilometra larg pikës kufitare Kosovë-Serbi në Merdare/Podujevë, kështu që Serbia po zhvillon stërvitje ushtarake shumë pranë kufirit me Kosovën, nëse e llogarisim distancën nga Çuprija në pjesën veriore të Kosovës, distancë kjo edhe me e vogël sesa ajo me Merdaren, shkruan Demokracia.com.

Në këtë stërvitje janë përdorur kryesisht armë dhe sisteme raketore të blera nga Rusia, vendi që po kryen agresion  dhe gjenocid ndaj Ukrainës. Serbia është i vetmi vend në Evropë që nuk i ka vendosur sanksione Rusisë dhe nuk e ka ndalur linjën ajrore Beograd-Moskë.

Kjo stërvitje e ushtrisë serbe mund të merret edhe si kërcënim i aleatit të Rusisë për fqinjët, konkretisht kërcënim i hapur ndaj Kosovës.

Siç njofton Ministria serbe e Mbrojtjes, në stërvitje kanë marrë pjesë më shumë se 1000 pjesëtarë të Ushtrisë, Forcave Ajrore dhe Mbrojtjes Ajrore, si dhe Brigadës së 72-të të Operacioneve Speciale dhe Brigadës së 63-të të Parashutës.

Pas stërvitjes, para publikut foli presidenti serb, Aleksandar Vuçiq.

Vuçiq paralajmëroi blerjen e syzeve franceze, kështu që ushtria serbe do të pajiset plotësisht për luftën e natës.

“Ishte e rëndësishme të shihej se sa shumë ka ndryshuar ushtria jonë. Kushtet e natës bëjnë dallimin midis ushtrive serioze dhe atyre që nuk janë aq të suksesshme.”

“Do të marrim edhe ‘syze franceze’ për vëzhgim natën. Ne treguam gjithçka në kushte reale. Sot kemi dhjetëra mijëra raketa. Është mirë të dimë se kemi dispozita të pastra dhe të sakta.”

“Ne pamë vetëm një pjesë të fuqisë së Pantsirit (sistemi raketor). Ju mund të shihni hendekun midis uniformave të kamuflazhit – të vjetra nga Yumko dhe të rejave. Është shumë më e vështirë për t’u parë, nuk mund ta zbuloni lehtësisht me kamerat e imazhit termik.”

“Ne do të duhet të forcojmë njësitë tona të helikopterëve, si dhe dronët pa pilot. Unë kam biseduar tashmë me Presidentin Erdogan për të blerë dronët ‘Bayraktar’ nga Turqia”, tha Vuçiq, transmeton Demokracia.com.

“Urime të gjithë pjesëmarrësve, stërvitja ishte e suksesshme dhe e rrezikshme, sepse gjuajtjet me municion fluturonin mbi kokat e ushtarëve tanë, mezi prisja të përfundonte. Ushtria jonë është shumë herë më e fortë se sa ka qenë ndonjëherë, gjë që është një pengesë për këdo që do të rrezikonte paqen dhe stabilitetin për qytetarët e Serbisë”.

I pyetur për forcimin e Gjermanisë, Vuçiq tha: “Gjermanët janë një komb serioz. Një investim i vetëm prej 100 miliardë dollarësh. Është një ndryshim magjepsës që ata bëjnë mes tyre dhe të gjithë të tjerëve në Evropë.”

“Për ne është e rëndësishme që Serbia të forcohet. Ne nuk kemi treguar gjithçka nga afër. Nuk do të ishte e lehtë për askënd që të kundërshtonte një fuqi të tillë zjarri.”

“Ne nuk synojmë të kërcënojmë askënd”, shtoi presidenti serb. /Demokracia.com/