Deputeti i LDK-së, Armend Zemaj, ka thënë në emisionin dPT te Fidani se është i shqetësuar pse Kryeministri i Kosovës, Albin Kurti, nuk po ftohet në SHBA.

Kurti kishte premtuar se do të udhëtonte në SHBA gjatë muajve të kaluar, por këtë nuk e bëri. Ai së fundi tha se ka dëshirë që në SHBA të bëjë një vizitë dyjavore e jo vetëm për disa ditë.

Zemaj thotë se deputetët e Kuvendit të Kosovës janë në kontakt me kongresmenë të ndryshëm dhe se është i shqetësuar pse Kurti nuk ka kontakte me amerikanët, shkruan Express.

“Po më vjen inati. Jam deputet. Vetëm gjatë këtij muaji me 15 kongresmenë kemi pasur kontakte me anë të Zoom-it e të tjera. Vetëm një, një grup i deputetëve do të udhëtojnë për në SHBA. Jam i shqetësuar si deputet e qytetar. Është Kryeministër i Kosovës se jo i VV-së. Dëshiroj që ai të ftohet në Departamentin e Shtetit. Dëshiroj që ai të jetë i ftuar në Zyrën Ovale sikur Avdullah Hotin”, thotë ai.

Zemaj tutje shton se është i frikësuar se zyrtarët amerikanë nuk dëshirojnë të flasin me Kurtin për shkak të përplasjeve të tij me përfaqësues amerikanë në të kaluarën.