Amir Rrahmani është kthyer në një nga shtyllat kryesore të mbrojtjes së Napolit këtë sezon.

Megjithatë përshtatja nuk ka qenë edhe aq e lehtë për të. Në sezonin e shkuar iu desh gjysma e kampionatit për të zbritur për herë të parë në fushë me fanellën e kaltër. Por kritikat do të pasonin pas një gabimi që solli golin e Udineses.

Në një intervistë për gazetën “Il Roma”, e cila do të publikohet e plotë ditën e nesërme, Rrahmani është shprehur se kritikat burojnë nga fakti se është kosovar. Gjithashtu në “Radio Kiss Kiss Napoli“ është zbuluar një fragmenti i shkurtër nga fjalët e kapitenit të Kosovës për gazetën italiane.

“Kritikat për gabimin tim në Udinesen sezonin e kaluar burojnë nga fakti se jam kosovar dhe për rrjedhojë se kombëtarja ime nuk është shumë e njohur në botë në nivel futbolli. Titulli? Nuk flas për këtë, jam supersticioz”, është një përmbajtje e shkurtër e intervistës së Amir Rrahmanit. /Demokracia.com