Borussia Dortmund është kthyer te fitorja në kampionat pasi është eliminuar në mesjavë nga Champions League.

Verdhezinjtë kanë marrë një fitore të rëndësishme 3-1 me përmbysje kundër Wolfsburg në javën e 13-të të kampionatit gjerman.

Ndeshja e luajtur në Volkswagen Arena nuk ka nisur mirë për Dortmund, që e ka parë veten në disavantazh pas vetëm 2 minutash lojë pas golit të Wenghorst.

Reagimi i miqve ka ardhur në minutën e 35-të me një penallti të Can. Në pjesën e dytë, në minutën e 55-të, ka ardhur përmbysje me Malen. 22-vjeçari ka
tundur rrjetën me një goditje të bukur nga jashtë zone.
Kjo fitore i ka dhënë mundësinë verdhezinjve që të parakalojë përkohësisht Bayernin në renditje dhe të marrë kreun e Bundesliga-s.

Në minutën e 73-të ka ardhur kthimi në fushë i Haaland, i cili nuk ka humbur kohë dhe ka shënuar 8 minuta pas futjes në fushën e lojës, duke fiksuar shifrat në 3-1. /Demokracia.com