Google po godet aftësinë e mohuesve të ndryshimeve klimatike për të fituar para nga platformat e saj dhe për të përhapur dezinformata klimatike përmes reklamave.

Kompania tha se nuk do të lejojë që reklamat të shfaqen së bashku me “përmbajtje që kundërshton konsensusin e mirë-krijuar shkencor rreth ekzistencës dhe shkaqeve të ndryshimit të klimës”. Google (GOOG) gjithashtu do të ndalojë reklamat që mohojnë realitetin e ndryshimit të klimës.

Politika, e cila do të hyj në fuqi muajin e ardhshëm, zbatohet për çdo përmbajtje në YouTube dhe platforma të tjera të Google që i referohet ndryshimit të klimës si një mashtrim, si dhe mohimet se emetimet e gazrave serrë ose aktiviteti njerëzor kontribuojnë në ndryshimin e klimës, raporton CNN përcjellë Demokracia.

“Ne kemi dëgjuar drejtpërdrejt nga një numër në rritje i partnerëve tanë të reklamave dhe botuesve të cilët kanë shprehur shqetësime për reklamat që shfaqen së bashku ose promovojnë pretendime të pasakta në lidhje me ndryshimet klimatike,” tha Google në njoftimin e saj.

“Reklamuesit thjesht nuk duan që reklamat e tyre të shfaqen pranë kësaj përmbajtje. Botuesit dhe krijuesit nuk duan që reklamat që promovojnë këto pretendime të shfaqen në faqet ose videot e tyre.”

Kompanitë e mëdha të teknologjisë janë përballur me presion në rritje, vitet e fundit për të kontribuar më shumë në luftën kundër ndryshimit të klimës, përfshirë veprimin kundër dezinformatave të lidhura me klimën në platformat e tyre.

Google gjithashtu nxori disa produkte në fillim të kësaj jave për të rritur ndërgjegjësimin për klimën, duke përfshirë një mjedis të ri në Google Maps që u tregon përdoruesve rrugën më eko-miqësore./Demokracia.com/