Japonia shënoi sot 78-vjetorin e bombardimeve atomike amerikane në Hiroshima , ku kryetari i saj kërkoi heqjen e armëve bërthamore dhe e quajti nocionin e liderëve të Grupit të Shtatë për parandalimin bërthamor një “marrëzi”.

Dita për të përkujtuar viktimat e sulmit të parë bërthamor në botë vjen pasi Rusia ka ngritur spektrin e përdorimit të armëve bërthamore në luftën e saj me Ukrainën.

Ajo vjen gjithashtu pasi filmi biografik “Oppenheimer”, që tregon krijimin e bombës atomike, është bërë një hit në Shtetet e Bashkuara. Disa e kanë kritikuar filmin për injorimin e gjerë të shkatërrimit të armëve në Hiroshima dhe Nagasaki.

Hiroshima ishte në qendër të vëmendjes në maj, ku kryeministri Fumio Kishida priti një samit të G7 në qytetin perëndimor, zonën e tij elektorale. Udhëheqësit e G7 lëshuan një deklaratë duke shprehur përkushtimin e tyre për arritjen e çarmatimit, por thanë se për aq kohë sa ekzistojnë armët bërthamore, ato duhet të shërbejnë për të penguar agresionin dhe për të parandaluar luftën.

Më 6 gusht të vitit 1945 gjatë Luftës së Dytë Botërore është hedhur bomba e parë atomike mbi qytetin e Hiroshimës në Japoni, e cila është pasuar nga një tjetër më 9 gusht në Nagasaki.

Bomba “Little Boy” është hedhur nga avioni B-29 Enola Gay i Flotës Ajrore të Shteteve të Bashkuara. Bomba me uranium, me forcën e 13 mijë TNT ka shkatërruar 70 për qind të Hiroshimës, duke krijuar nxehtësi prej 3.000 centigradësh.

Bomba atomike ka rrafshuar me tokën çdo gjë në një diametër prej 1.5 kilometrash, ndërsa ka shkaktuar 80 mijë të vdekur vetëm në fazën e parë dhe 140 mijë deri në fund të vitit 1945 nga djegiet dhe helmimet nga rrezatimi.

Ndërkaq, në Nagasaki, kodrat përreth qytetit kanë kufizuar përhapjen e forcës shkatërruese të bombës me fuqi 22 mijë TNT të hedhur nga një lartësi 500 metra, megjithatë rreth 70 mijë persona kanë humbur jetën në fazën e parë dhe gjysma e qytetit është shkatërruar.

Perandori i atëhershëm i Japonisë, Michinomiya Hirohito, në mesazhin e tij më 15 gusht ka deklaruar dorëzimin e vendit të tij pa kushte, duke thënë se “vazhdimi i luftës do ta shkatërronte popullin japonez”. /A2CNN