Gati 80 vende kërkuan të dielën që “integriteti territorial” i Ukrainës të jetë baza për çdo marrëveshje paqeje për t’i dhënë fund luftës dyvjeçare të Rusisë.

Kështu raportojnë mediat e huaja, sipas të cilave, komunikata e përbashkët mbylli një konferencë dy-ditore të shënuar nga mungesa e Rusisë, e cila nuk ishte e ftuar.

Por shumë pjesëmarrës shprehën shpresën se Rusia mund të bashkohet në një udhërrëfyes drejt paqes në të ardhmen.

Lufta e gjithanshme që nga pushtimi i Ukrainës nga presidenti Vladimir Putin në shkurt 2022 ka vrarë ose plagosur qindra mijëra njerëz, ka shkaktuar telashe në tregjet për mallra si drithëra dhe plehra, si dhe ka dëbuar miliona nga shtëpitë e tyre.

Rreth 100 delegacione, kryesisht vende perëndimore, morën pjesë në konferencën që u konsiderua si hapi i parë drejt paqes.

Aty përfshiheshin presidentë dhe kryeministra nga Franca, Gjermania, Britania, Japonia, Polonia, Argjentina, Ekuadori, Kenia dhe Somalia.

Selia e Shenjtë u përfaqësua gjithashtu dhe zëvendëspresidentja Kamala Harris foli në emër të Shteteve të Bashkuara të Amerikës.

India, Meksika, Arabia Saudite, Afrika e Jugut, Tajlanda dhe Emiratet e Bashkuara Arabe – të përfaqësuara nga ministra të jashtëm ose të dërguar të nivelit më të ulët – ishin ndër vendet që nuk nënshkruan dokumentin përfundimtar, i cili fokusohej në çështjet e sigurisë bërthamore, sigurisë ushqimore dhe shkëmbimi i të burgosurve.

Sidoqoftë, dokumenti përfundimtar i nënshkruar nga 78 vende thoshte se Karta e OKB-së dhe “respekti për integritetin territorial dhe sovranitetin … mund dhe do të shërbejnë si bazë për arritjen e një paqeje gjithëpërfshirëse, të drejtë dhe të qëndrueshme në Ukrainë”.

Kjo ka qenë një gjë “jo e pranuar” për Putinin, i cili dëshiron që Ukraina të lëshojë më shumë territor dhe të largohet nga shpresat e saj për t’u bashkuar me aleancën ushtarake të NATO-s.