Është konferencë e 18 shkurtit 2008, diku në Tanzani. Nga atje, George Bush, asokohe President i Shteteve të Bashkura të Amerikës, uroi Kosovën për shpalljen e Pavarësisë.

“Dje, Shtetet e Bashkuara të Amerikës e kanë njohur Kosovën si shtet sovran dhe i pavarur. Në deklaratën e Pavarësisë, Kosova ka mbështetur nivelet më të larta të demokracisë, përfshirë lirinë, tolerancën dhe drejtësinë për qytetarët e të gjitha etnive”, kishte deklaruar George W. Bush – Ish-President i SHBA-së.

16 vjet pas, ambasada e Shteteve të Bashkuara të Amerikës në Kosovë, e publikoi deklaratën e plotë, me të cilën e njohën Kosovën si shtet.

Sikur SHBA, vepruan edhe shtete të tjera të fuqishme, si Franca, Mbretëria e Bashkuar, Turqia, Australia, Gjermania e Italia.

“Ato njohjet e rrufeshme do t’i quaja, me numër dhe me kualitet të shteteve më të rëndësishme botërore dhe shteteve kryesisht perëndimore demokratike, e kanë legjitimuar shpalljen menjëherë, sepse palët kundërshtuese prej Serbisë, Rusisë e të tjera kanë qenë në funksion pengimit”, ka rrëfyer Anton Berisha – Ish-ambasador.

Ish-ambasadori, Anton Berisha, vlerëson gjithë këto njohje erdhën, pasi Kosova e shpalli Pavarësinë në koordinim të plotë me ndërkombëtarët.

Mirëpo, ndër vite me ndryshimin e situatave gjeopolitike, Berisha thotë se u pamundësua anëtarësimi i Kosovës në Organizatën e Kombeve të Bashkuara.

“Pozicioni i Rusisë filloi të ngurtësohet, për fat të keq çdoherë e më shumë, sepse Putini filloi periudhën e së cilës po shihen tani efektet, e politikës së vjetër ruse ekspanzioniste dhe me qëllime të ndikimit në Evropën Lindore, Qendrore ose edhe në pjesën tonë jug-lindore”, ka theksuar Anton Berisha – Ish-ambasador.

Izraeli është shteti i fundit, i cili e ka njohur Pavarësinë e Kosovës. Institucionet kosovare, vazhdojnë të lobojnë për njohje të reja, përderisa Serbia e bën krejt të kundërtën, duke lobuar që njohjet të tërhiqen.