Sot janë bërë 10 vjet nga tragjedia e Restelicës, ku si pasojë e rënies së ortekut të borës humbën jetën 10 banorë, të gjithë të një familje të këtij fshati. Kësaj fatkeqësie i mbijetoi vetëm, Amsera Reka, e cila në atë kohë ishte 7 vjeçare.

Shemsi Syla, i cili në atë kohë ishte Komandant i Njësisë Ndërlidhëse për Reagim ndaj Krizave të FSK-së, ka kujtuar ngjarjen tragjike, duke thënë se kishte në krah përgjegjësi të trefishtë.

“Në punën time shumëvjeçare ushtarake, ka pasur shumë momente nga të cilat kujtesa ime nuk ndahet dot. Por, ngjarja e Restelicës është një kujtim që e përjetoj edhe tani. Atëkohë, si Komandant i Njësisë Ndërlidhëse për Reagim ndaj Krizave të FSK-së, në ballë të stuhisë së tragjedisë në njerën anë, në tjetrën udhëheqjen e ushtarëve në kërkim, duke shërbyer njëkohësisht si urë lidhëse mes ngjarjes dhe mediave, kisha në krah përgjegjësinë e trefishtë”, ka shkruar ai, përcjell Demokracia.com.

Më tej Syla tha se ajo ditë tragjike u shtri në orë  të gjata në kërkim, nën kushte të tmerrshme atmosferike, nen presionin e tmerrshëm të idesë se një familje e tërë po shuhet nën acarin ortekut të tmerrshëm.

“Atëherë kur filloi të na zbehet shpresa, një dritë shndërriti zemrat tona. Ajo ishte Amsera e vogël, e cila me shpirtin e saj të pastër, e mbijetoi edhe të ftohtin, edhe tragjedinë, edhe vdekjen e të gjithë anëtarëve të familjes së saj. Anjëherë nuk e harroj atë moment! Frymëmarrja e saj ishte gjithçka që ëndërruam në ato momente! Me lot gëzimi  e dhembjeje njëkohësisht, me ndjenja të përziera, nxorrëm nga rrënojat e shtëpisë së saj, Amserën e vogël e cila sot, 10 vjet më pas, është bërë një vajzë e madhe, me shpirt të pastër e një personalitet të paparë”, tha Syla.

Ai tha po ashtu se me Amserën, i mban ende kontaktet.

“Ajo tani jeton me gjyshërit e saj në Itali, nën përkujdesjen dhe dashurinë që e meriton. Sa shumë gëzohem kur ajo më shkruan! Gëzohem për jetën, hidhërohem për fatin e një familjeje të tërë që vdiqën pa pasur mundësi lamtumire mes vete! Sot 10 vjet, familjarët Reka nga Restelica u zhdukën nga orteku i tmerrshëm që i mori në orët e hershme të mëngjesit! Dritë u bëftë shpirti i tyre, e Amsera, tashmë vajzë e madhe, i kujtoftë me kujtimet më të bukura!”, tha Syla./Demokracia.com/