Zëdhënësi i Departamentit të Shtetit, Ned Price, la të kuptohet se veprimet shtesë të SHBA-së kundër Rusisë do të vijnë “shumë shpejt” kur u pyet në lidhje me kërkesën e presidentit ukrainas Vladimir Zelensky për sanksione më të mëdha të G7-ës në përgjigje ndaj mizorive të fundit ruse në Bucha.

Pamje tronditëse dolën në dritë nga Bucha, Ukrainë të shtunën nga AFP, të të paktën 20 burrave civilë të vrarë dhe të rreshtuar në një rrugë të vetme. Fotot u publikuan në të njëjtën ditë kur Ukraina e shpalli qytetin të çliruar nga trupat ruse.

“Kur bëhet fjalë për sanksionet tona, ne gjithmonë kemi thënë se do të vazhdojmë të ushtrojmë presion mbi Putin, Kremlinin, mbi të gjithë ata rreth tij, duke përfshirë oligarkët dhe miqtë që po fuqizojnë këtë luftë të zgjedhur kundër Ukrainë. Kështu që unë dyshoj se shumë shpejt do të shihni presion shtesë të aplikuar,” tha Price sot për MSNBC.

I pyetur në lidhje me bisedimet e paqes, Price tha se nuk kanë parë ende ndonjë tregues se rusët janë vërtet seriozë për ndërprerjen e luftës.